2011/2012 futbol mövsümü "Xəzər Lənkəran” üçün xeyli çətin və strategiya baxımından anlaşılmaz başlasa da komandamızın geridə qalan səkkiz turu uğurla keçirərək, hələki ilk pillədə qərarlaşması, şəriksiz liderliyini sürdürməsi bütün azarkeşlərimizi çox sevindirir. Bu həmin azarkeşlərdir ki, keçən mövsüm Mirça Rednikli "Xəzər Lənkəran”la gümüş medallara sahib çıxmanın və ölkə kubokunu qazanmanın sevincini çılğıncasına yaşadılar. Avrokubok həyacanını yaşayaraq, ilk mərhələdəcə güclü Təl-Əviv "Makkabi”sinə iki oyunun nəticəsinə görə məğlub olmanın üzüntüsünü yaşadılar. 

Onu da deyək ki, sonrakı mərhələlərdə "Makkabi” bu il də heç də zəif rəqib olmadığını dəfələrlə sübut etdi. Belə ki, Moldovanın ən güclüsü olan "Şerif”i yarışlardan kənarlaşdırmağı bacaran, "Jelezniçar”ı səfərdə 0:2, evdə isə 6:0 məğlub etməklə üst-üstə səkkiz cavabsız topla keçməyi bacardı. Bundan sonra Avropada az-çax tanınmış Yunanıstanın "Olimpiakos klubunu evdə 3:0 məğlub etdi və iki oyunun nəticəsinə görə onları da keçməyi bacarıb, Avropa Liqasının qrup mərhələsinə adını yazdırdı. Bax belə güclü rəqiblə qarşılaşan və heç də əskik oyun nümayiş etdirməyən "Xəzər Lənkəran”ın dözülməsi mümkün olmayan acı günləri başladı.

Bəli, bir "Xəzər Lənkəran” azarkeşləri kimi biz də bu günləri, bu dəqiqələri və başverənləri yada saldıqca sanki damarlarımızda qanımız hərəkətdən dayanır. Çox şükürlər olsun ki, "Xəzər Lənkəran” camiəsi olaraq, həm azarkeşlər, həm məşqçi-futbolçu heyəti və həm də klub rəhbərliyi bu vəziyyətdən çıxmağı bacardı. Bu gün isə yetərincə uğurlu çıxış edərək, zirvəni fəth etməyi bacarıb.

Bu olanlardan sonra komandanı toparlayıb hal-hazırki yüksək səviyyəyə çatmaqda, keçən mövsümün isə azarkeş-komanda sıx birliyində və gözəl oyun üslubu ilə titullara çatmasında cənab Mirça Rednikin böyük əməyi var. İnanırıq ki, bu mövsüm də azarkeş-komanda birliyi nəticəsində daha böyük uğurlara imza atacağıq. "Xəzər Lənkəran” azarkeşi bunu qiymətləndirə bildiyi kimi, onların sevimlisinə çevrilən Mirça Rednik də bunu çox gözəl başa düşür və qiymətləndirməyi bacarır. Məhz onun həmişə vurğuladığı kimi: "Azarkeşlərimizə minnətdarıq!”, "Bu qələbəni azarkeşlərimizə hədiyyə edirik!”, "Onlar həmişə bizim yanımızdadırlar!”, "Bu azarkeşlərlə ölümə getməyə belə dəyər!”, "Olnar daha artığına layiqdirlər!”, "Onlar əzizlənməyə layiqdirlər, onları qoruyun!” kimi fikirləri söyləyərək, daim azarkeş faktoruna xüsusi diqqət yetirməsi əlbəttə, "Xəzər Lənkəran” azarkeşinin kimliyindən xəbər verən bir amildir və baş məşqçi tərəfindən bunun qiymətləndirilməsi isə onlar üçün bəlkə də ən böyük mükafatdır. Arzu edirik ki, azarkeş amili bütün səviyyələrdə belə qiymətləndirilə bilsin. Yalnız bu halda əlbəttə komandamız ən yüksək nailiyyətlərə doğru inamla adımlaya bilər.

Mirça Rednikin azarkeşlərə verdiyi önəm haqqında yuxarıda özünün dediyi fikirləri yada salmışdıq. Hətta onun yenidən komandamızda qalması və müqaviləyə imza atması zamanı da dediyi sözləri bir daha yada sala bilərik. "Mənə maddi baxımdan daha yüksək təkliflər olmasına barmayaraq, mən yalnız "Xəzər Lənkəran”la müqaviləyə imza atdım. İmza atarkən isə yalnız azarkeşləri düşündüm” deməsi, bu səbəbdən "Xəzər Lənkəran”ı sevməsi və bu komanda ilə daha böyük gələcəyə inanmağını söyləməsi əlbətdə bizə də xoşdur. Biz də onun istedadına və təcrübəsinə inanaraq, komandamızın uğurlarına inanırıq.

Komandamızın son ölkə kubokunu qazanarkən, Lənkərana qayıdaraq azarkeşlərlə stadionda nəzərdə tutulmuş tədbirə yollanan zaman, onların qaliblər kimi necəı qarşılanması yəqin ki, çoxlarının yadından çıxmayıb. Bu mənzərədən riqqətə gələn Mirça Rednikin dediyi aşağıdakı fikirlərlə çoxlarımız artıq tanış olsaq da, onun özünün avtobusda gedərkən bu mənzərələri lentə almasından bəlkə də çoxları xəbərsizdir. Çoxdan idi ki, Rednikin özünün lentə aldığı bu kadrları sizlərə təqdim etmək istəyimiz vardı. Amma bizdən asılı olmatan müəyyən səbəblərdən yubanmalı olduq. Beləliklə eksklüziv olaraq Rednikin özünün çəkdiyi şəkilləri  "Bosman” fanklubunun rəsmi saytında sizlərə təqdim edirik.

Mirça Rednik:-"Yol boyu yüzlərlə maşının bizi müşayiət etməsi, Lənkəranın küçələrində minlərlə insanın bizi alqışlaması elə sevindirici hissdir ki, sözlə ifadə etmək mümkün deyil. Küçələrə axışan, evlərinin qapısına çıxaraq bizi alqışlayan uşaqlı, qadınlı, qocalı hamı bizə sevgisini göstərdi. Sevincimdən az qala ağlayacaqdım. Harada olmuşamsa belə bir qarşılanma  heç yerdə heç vaxt görməmişəm.”