Bildiyimiz kimi Avstriyada təlim-məşq
toplanışında olan "Xəzər Lənkəran” komandası həm də burada yoxlama oyunları
keçirməyi planlaşdırıb. Belə ki, bir neçə gün əvvəl komandamız Almaniyanın həvəskar
dəstəsində iştirak edən "Starnberq” komandasına 6:0 hesabı ilə qalib gəlmişdi. Bu ilk
yoxlama oyunu idi. Lakin dünən "Xəzər Lənkəran” Kiyevin "Dinamo” komandası ilə
ikinci yoxlama oyununu keçirib. Oyun Kiyev "Dinamo”sunun rəsmi saytı vasitəsi
ilə canlı yayımlanıb ki, bu fürsətdən də komandamızın çoxsaylı azarkeşləri
yararlana bilib. Bunun üçün, yəni hətta komandanın yoxlama oyunlarını belə
yayımladığına görə bu kluba futbol adına təşəkkür etmək lazımdır. Bu bizim üçün
də böyük örnəkdir.
Onu da qeyd edək ki, Kiyev "Dinamo”sunun əsas heyətinin
futbolçuları Ukrayna millisinin tərkibində AVRO-2012 də iştirak etdiklərindən, əsasən
ehtiyatda oturan skamya futbolçuları komandamızla görüşdə iştirak edə biliblər.
Kiyev "Dinamo”sunun baş məşqçisi Yuri Syomin
"Xəzər Lənkəran”la Avstriyada keçirilən yoxlama oyunundan sonra apasport.az
saytının Avstriyaya ezam olunmuş əməkdaşının suallarını cavablandırıb. Syomin
ilk olaraq 2:0 hesabı ilə qalib gəldikləri oyun barədə danışıb.
- Oyun daha çox məşq xarakterli idi. Ancaq yetərincə
gərgin alındı. İlk hissədə bizim, fasilədən sonra "Xəzər Lənkəran”ın üstünlüyü
var idi. Çoxlu qol imkanlarımız oldu. Hazırlıq getdiyindən ağır yükləmələr
fonunda çətinliklə üzləşirsən. Öz komandamdan daha keyfiyyətli oyun görmək istərdim.
Siz də öz klubunuza qiymət verə bilərsiz. "Xəzər Lənkəran”ın oyunu mənim xoşuma
gəldi, mobil komandadır. Onlara gələcək oyunlarda uğurlar arzulayıram.
- Bu komanda Ukrayna çempionatında çıxış etsəydi,
hansı yerlər uğrunda mübarizə apara bilərdi?
- İndi durub, niyə belə müqayisə
aparaq ki? Hazırlıq dövrü gedir.
- "Xəzər Lənkəran” gənc komandadır və sizin kimi təcrübəli
mütəxəssisin fikirlərinə ehtiyac var...
- Fikirlərim müsbətdir. "Xəzər Lənkəran”
taktiki cəhətdən yaxşı komandadır. Heyətində yetərincə güclü futbolçular var.
- Lənkəran klubunun heyətində Kiyev "Dinamo”sunda
oynamaq gücündə olan futbolçu varmı?
- Mən daha çox öz oyunçularıma
baxırdım. Üstəlik, sizin komandanızın heyətində çoxlu əvəzetmələr oldu. "Xəzər
Lənkəran” yetərincə xarakterə malik mobil komandadır. O da bizim kimi yeni
mövsümə hazırlıq dövrü keçir.
- Maraqlıdır ki, "Xəzər Lənkəran”ın baş məşqçisi
Yunis Hüseynovu futbol oynadığı dövrdə sərəncamınızda görmək istəmisiz...
- (gülür). Bəli, belə bir şey olub. İndi həmkarım
olan Hüseynova uğurlar arzulayıram.
- 3 il öncə belə bir xəbər yayılmışdı ki, siz Azərbaycan
yığmasının və "Xəzər Lənkəran”ın qapıçısı Kamran Ağayevlə maraqlanaraq, onu
"Dinamo”ya gətirmək istəmisiz...
- Fikrimcə, Kamran ilk hissədə uğursuz çıxış
etdi. Vurduğumuz qol zamanı səhv buraxdı. Buna görə də Ağayevlə bağlı məsələni
sonraya saxlayaq.
| 
