"Denis Silvanı qaytarmaq fikrindəyik. Bu barədə iş gedir və məsələ böyük ölçüdə həll edilib. Denis özü də yenidən komandamızda oynamaq istəyir”. Bu fikirləri  "Xəzər-Lənkəran” klubunun baş məşqçisi Ağasəlim Mircavadov deyib. 

Mircavadov bildirib ki, 25 yaşlı futbolçunun son yarım ili keçirdiyi Braziliyanın A seriyası təmsilçisi "Qremio Prudente” rəhbərliyi Silvanın dönüşünə razılıq verib: "Həm Denis, həm də klub rəhbərliyi ilə danışmışıq. Futbolçunun transfer işləri ilə türk menecer məşğul olur. Dünən Denisin klubundan dedilər ki, rəhbərlik qol çəkdiyi kağızları göndərir. Braziliya ilə Azərbaycan arasında saat fərqinin olmasını nəzərə almalıyıq. İndi orda səhərdir. Bir neçə saatdan sonra Denisin sənədləri ofisimizdə olacaq. Əlbəttə, razılaşma var və biz ona qol çəkəcəyik. Bununla da transfer rəsmiləşəcək”.

Silva Azərbaycan kubokunu və "Birlik kuboku”nu qazandığı "Xəzər-Lənkəran”ın heyətində iki il oynadıqdan sonra bitən müqaviləsini uzatmadı. O, qışda vətəninə qayıtmağa üstün tutdu. Maraqlıdır, görəsən braziliyalını qısa müddətdən sonra geri qayıtmağa nə vadar edir? "Düzdür, Denis qışda vətənə orada oynamaq istədiyinə görə qayıtdı. Daim öz klubunda oynayırdı. Deyəsən, sonradan klubunda narazılıq yaranıb. Eşitdiyimə görə, ailə vəziyyətinin təsiri olub. Mən bunu dəqiq deyə bilmərəm. Biz Silva ilə əlaqə saxladıq. Dedi ki, geri qayıtmaq istəyərəm. Biz də buna görə hərəkət etdik və işi həll etdik. Mən açıq deyirəm ki, Silvanın həmin vaxt buradan getməyə ürəyi də yox idi. Həyatdır, hamıda belə şeylər olur”.

Qeyd edək ki, Braziliya mətbuatında Denisin Azərbaycan klubundan təklif alaraq, yenidən ölkəmizə qayıtdığı yazılsa da, bunun "Neftçi” olduğu iddia edilirdi. 

Mənbə: "Apasport.az" saytı